బీర్కూర్, రాజముద్ర న్యూస్:
బీర్కూర్ ప్రాథమిక వ్యవసాయ సహకార సంఘం (సొసైటీ) చైర్మన్ పదవికి పోటీ రోజురోజుకీ ఉత్కంఠగా మారుతోంది. ఈ రేస్లో కాంగ్రెస్ సీనియర్ నాయకుడు పుల్లేని పీరయ్య పేరు బలంగా వినిపిస్తోంది. గ్రామీణ స్థాయిలో పట్టు, పార్టీకి దీర్ఘకాల సేవలు చేసిన నాయకుడిగా ఆయనకు మంచి గుర్తింపు ఉండటంతో పాటు, స్థానికంగా మంచి ఫాలోయింగ్ కూడా ఉన్నట్లు తెలుస్తోంది.
ఇటీవల రాజకీయ పరిణామాల నేపథ్యంలో పీరయ్యకు మద్దతు పెరుగుతోందని కాంగ్రెస్ వర్గాలు పేర్కొంటున్నాయి. ముఖ్యంగా మాజీ ఆగ్రో ఇండస్ట్రీస్ చైర్మన్ కాసుల బాలరాజ్ అండదండలు పీరయ్యకు బలమైన ప్లస్గా మారాయి. బాలరాజ్ మద్దతుతో పార్టీ అంతర్గత సమీకరణాలు పీరయ్య వైపు మళ్లుతున్నాయని సమాచారం.
గ్రామీణ రైతుల సమస్యలు, సొసైటీ కార్యకలాపాలపై పీరయ్యకు మంచి అవగాహన ఉండటం, రైతులతో సన్నిహిత సంబంధాలు కలిగి ఉండటం ఆయనకు అదనపు బలం అవుతున్నాయి. ఈ నేపథ్యంలో చైర్మన్ రేస్లో ఆయన ముందంజలో ఉన్నారనే చర్చలు జోరుగా సాగుతున్నాయి.
అయితే, ఇంకా అధికారికంగా ఎవరూ బాధ్యతలు స్వీకరించని పరిస్థితిలో పార్టీ అంతర్గత చర్చలు కొనసాగుతున్నాయి. చివరి నిమిషంలో మార్పులు చోటుచేసుకునే అవకాశం ఉన్నప్పటికీ, ప్రస్తుతం మాత్రం పుల్లేని పీరయ్య పేరు హాట్ టాపిక్గా మారింది.